Katwiran at Katibayan

PAGTATANGGOL SA KARANGALAN NG PAMILYA
SA BAWAT PAMILYANG PILIPINO, MAY DALAWANG BAGAY NA BINIBIGYAN NG IBAYONG HALAGA: KARANGALAN AT TAHANAN.
ANG AMING KAPATID NA SI SENADOR PANFILO “PING” LACSON AY INAKUSAHANG UTAK SA PAGPATAY KAY SALVADOR “BUBBY” DACER AT SA KANYANG TSUPER. ANG PANGUNAHING KATIBAYANG GINAMIT BILANG “PROBABLE CAUSE” LABAN SA KANYA NG DOJ SA NAKARAANG ADMINISTRASYON AY ANG PINANUMPAANG SALAYSAY NI CEZAR MANCAO. SA NASABING SALAYSAY, IDINETALYE NI MANCAO ANG ANIYA’Y NARINIG NIYANG PAG-UUSAP SA PAGITAN NINA PING AT MICHAEL RAY AQUINO. INUTUSAN DAW NI PING SI AQUINO NA IPAPATAY SI DACER. DI UMANO AY NARINIG NIYA ANG PAG-UUSAP NA ITO SAMANTALANG SIYA AY NAKA-UPO SA GAWING UNAHAN NG SASAKYAN KATABI NG NOO’Y NAGMAMANEHONG “DRIVER” NG SENADOR NA SI REYNALDO OXIMOSO. NAKA-UPO NAMAN UMANO SA LIKURAN NG SASAKYAN SINA PING AT AQUINO.

UPANG MAPAGTIBAY ANG TINATAWAG NA “PROBABLE CAUSE” SA ISANG KASO NG KRIMEN, KAILANGANG ITO AY KAPANI-PANIWALA PARA SA MGA NAG-IIMBESTIGA AT SA HUWES NA MAY HAWAK NG KASO. DAPAT MAPAGPASIYAHAN SA PAMAMAGITAN NG MATUWID NA KAISIPAN NA ANG ISANG AKUSADO AY MAYROON NGANG PANANAGUTAN.

KAMI AY NANINIWALA NA KUNG MAINGAT NA ISASAALANG-ALANG ANG MGA SUMUSUNOD AY MABUBUO ANG KATOTOHANAN AT KONKLUSYON NA ANG NILAGDAANG SALAYSAY NI MANCAO AY MGA PINAGTAHI-TAHING KASINUNGALINGAN LAMANG:

1. ITINANGGI NI OXIMOSO SA ISANG SINUMPAANG SALAYSAY SA KORTE NA NAGKAROON NG GAYONG PAG-UUSAP SA SASAKYANG MINAMANEHO NIYA. NILIWANAG PA NA SA BUONG PANAHON NA SIYA AY NAGLINGKOD BILANG “SECURITY-AIDE, DRIVER” NI PING, ANG PINAPAHINTULUTAN LAMANG UMUPO SA UNAHAN KATABI NG “DRIVER” AY ANG “AIDE DE CAMP” NG SENADOR; KAYA’T WALANG KATOTOHANAN ANG SINABI NI MANCAO NA SIYA AY NAKA-UPO DOON. IDINAGDAG PA NI OXIMOSO SA KANYANG “AFFIDAVIT” NA HINDI KAILANMAN NAGKASAMA-SAMA SA KANYANG SASAKYANG MINAMANEHO NANG MGA PANAHONG IYON SINA PING, AQUINO AT MANCAO. GAYUNDIN, SI AQUINO AY NAGBIGAY NG SINUMPAANG SALAYSAY SA KONSULADO NG PILIPINAS SA AMERIKA NA SA BUONG PANAHON NG KANYANG PANUNUNGKULAN BILANG HEPE SA OPERASYON NG PAOCTF AY HINDI KAILANMAN SILA NAGKASAMANG TATLO NINA PING AT MANCAO SA IISANG SASAKYAN. TANDISAN NIYANG ITINANGGI NA MAYROON SIYANG TINANGGAP NA UTOS MULA KAY PING UPANG IPAPATAY SI DACER O SINO PA MANG TINUTUKOY NA “BERO” AT “DELTA”.
2. MISMONG “AFFIDAVIT” NI MANCAO ANG MAGPAPATUNAY NA ANG NILALAMAN NITO AY PAWANG KASINUNGALINGAN AT GAWA-GAWA LAMANG. DOON AY SINABI NIYA NA ANG USAPAN SA LOOB NG SASAKYAN AY NAGANAP NOONG OKTUBRE 2000. NGUNIT NILIWANAG NIYA SA ISANG PAGDINIG SA KORTE NG KANYANG PETISYON PARA MAGING “STATE WITNESS” NA ANG PAG-UUSAP SA SASAKYAN AY NANGYARI BUWAN NG SETYEMBRE 2000 O MGA UNANG ARAW NG OKTUBRE 2000. IDINAGDAG PA NIYA NA NATATANDAAN NIYA ITONG MABUTI SAPAGKAT ITO AY NANGYARI NANG MGA PANAHONG ANG DATING PANGULONG ESTRADA AY NASA LABAS NG BANSA. ANG KANYANG PAHAYAG NA ITO AY MALAYA NIYANG GINAWA SA PAGTATANONG NG TAGA-USIG NG DOJ NA SI HAZEL VALDEZ. NALIMUTAN NI MANCAO NA GAYA NG PINATUNAYAN SA MGA SINUMPAANG SALAYSAY NG DATING SENADOR MAR ROXAS AT “UNDERSECRETARY” MIKE TOLEDO, NANG MGA PANAHONG IYON AY MAGKAKASAMA SILA NINA PING AT PRESIDENTE ESTRADA SA AMERIKA PARA SA ISANG “OFFICIAL VISIT.” PARA NAMANG PINAGTIYAP NG PANGYAYARI NA ANG TAGA-USIG NG DOJ NA SI HAZEL VALDEZ AY MAY BAHAGI SA PAG-GAWA NG “AFFIDAVIT” NI MANCAO NA MAY PETSANG PEBRERO 14, 2009, ARAW NG SABADO. ISANG “NON-WORKING DAY” NANG MANUMPA SI MANCAO SA HARAP NG KONSUL NG PILIPINAS SA AMERIKA NA SINAMAHAN PA NI VALDEZ SA LOOB NG PIITAN SAPAGKAT SI MANCAO AY NAKAKULONG DOON.
3. LALONG NAGING MALIWANAG NA BATBAT NG KASINUNGALINGAN ANG “AFFIDAVIT” NI MANCAO SAPAGKAT ILANG BUWAN BAGO NIYA ITO LAGDAAN , NANG NASA AMERIKA PA SIYA AY MAYROON SIYANG “INTERVIEW” SA RADYO DZMM AT MAGING SA TELEBISYON SA “CHANNEL 7” KUNG SAAN AY NAGPAHAYAG SIYA NA INA-AMUKI SIYA NG “PRESIDENTIAL SECURITY CHIEF” NA SI GENERAL PRESTOZA NA IDAWIT SI PING SA KASONG PAGPATAY KAY DACER. ANG ALOK AY I-“RELOCATE” SIYA, SAMPU NG KANYANG PAMILYA SA SINGAPORE NA LIBRE LAHAT ANG GASTOS. NAKAPAGTATAKA BA NA MARAHUYO SI MANCAO SA MAGANDANG ALOK KAPALIT NG PAGIGING “STATE WITNESS” LABAN KAY PING?
4. IPAGPALAGAY NANG TOTOO, KAHIT PARANG KWENTONG KUTSERO KUMBAGA, NA MAYROON NGANG NAGANAP NA PAG-UUSAP SA LOOB NG SASAKYAN. SI MANCAO AY UMAMIN NAMAN SA ISANG “HEARING” NA HINDI TALAGA SIYA NAKATITIYAK TUNGKOL SA KANYANG MGA NARINIG.
5. NANGINGIBABAW SA LAHAT NG ITO ANG TESTIMONYA NI GLENN DUMLAO SA MARAMING “AFFIDAVIT” NA KUSANG LOOB NIYANG NILAGDAAN ANG PAGPAPATUNAY NA TALAGANG WALANG KINALAMAN SI PING SA KRIMENG IBINIBINTANG. ISA SA MGA “AFFIDAVIT” NA IYON ANG NAGLALARAWAN KUNG PAANO SIYA PINAHIRAPAN NG MGA PINUNO NG NAGDAANG ADMINISTRASYON; PISIKAL, MENTAL AT EMOSYONAL PARA LAMANG PILITIN NA IDAWIT NIYA SI PING SA KASONG DACER-CORBITO “DOUBLE MURDER CASE”. SUBALIT SIYA AY PATULOY NA NANINDIGAN SA NGALAN NG KATOTOHANAN. SUBALIT SA KABILA NG MGA GAWA-GAWANG EBIDENSYA LABAN KAY PING, ANG DATING PAMUNUAN NG DOJ AY TULUYANG NAGSAMPA NG KASO. AT ANG KORTE NAMAN AY NAGLABAS NG “WARRANT OF ARREST” BAGO MATAPOS ANG TERMINO NG NAGDAANG ADMINISTRASYONG NIYANIG NI PING SA PAGBUBULGAR NG KATAKOT-TAKOT NA KORAPSYON.

SA PAGNANAIS NA PALAKASIN ANG KASO LABAN KAY PING, ANG DATING DOJ AY MAYROON PANG SINASABING SULAT NI DACER KAY ESTRADA NA NANINIRA KAY PING NA WALA NAMANG IPINAKITANG PATUNAY NA IYON AY NAKARATING SA KAALAMAN NI PING. MAYROON DIN DAW USAP USAPAN NA NAGKU-KWENTO SI DACER SA MGA ANAK NA ANUMAN ANG MANGYARI SA KANYA AY SI PING ANG MAY KINALAMAN AT DAPAT SISIHIN. ANG MGA ALEGASYON NA KATULAD NITO ANG MAGPAPATUNAY SA KAWALAN NG MALIWANAG AT MATIBAY NA EBIDENSYA NA MAARING TAWAGING “PROBABLE CAUSE”.

SA HULING PASKO NA NAGKASAMA SAMA KAMING MAGKAKAPATID KABILANG SI PING AY NAGPAHAYAG SIYA NG PAGKABAHALA SA PAGPIPILIT NG NAKARAANG ADMINISTRASYON NA MAKAKUHA NG “WARRANT OF ARREST” LABAN SA KANYA. SUBALIT KANYANG SINABI SA AMIN NA MAAARI NAMING IPANATAG ANG AMING KALOOBAN SA KATOTOHANAN NA INOSENTE SIYA SA KASALANANG IBINIBINTANG SA KANYA.

BAGO PA LUMABAS ANG “WARRANT OF ARREST”, NAGPASIYA SI PING NA IWASAN ANG INAASAHANG PAGDAKIP SA KANYA. IYON AY SARILI NIYANG DESISYON, WALANG KINALAMAN ANG KARUWAGAN O PAGIGING “GUILTY”. BILANG ISANG DATING “INTELLIGENCE OFFICER” NG PNP, MAYROON SIYANG IMPORMASYON NA HINDI NA NIYA IPINALIWANAG SA AMIN. ANG ISANG NABANGGIT NA ALAM NA ALAM NIYA, ANG “RTC JUDGE” NA MAY HAWAK NG KASO AY MAYROONG APLIKASYON PARA MAGING “JUSTICE” SA “COURT OF APPEALS”. HINDI NA KAILANGANG HULAAN PA ANG SUSUNOD NA MANGYAYARI.

HINDI NGA NAGKABULA ANG INIISIP NI PING. ARAW NG BIERNES, PEBRERO 5, 2010, LUMABAS ANG “WARRANT OF ARREST”. LUNES, PEBRERO 8, 2010, ANG NASABING HUWES AY INENDORSO NG “JUDICIAL BAR COUNCIL” KAY PRESIDENTE GLORIA ARROYO AT PAGKARAAN NGA NG ISANG BUWAN AY NA-“PROMOTE” SA “COURT OF APPEALS”.

MULA NOON, TULUYAN NANG HINDI NAGPAKITA SI PING AT NAGPASIYANG IWASAN MUNA ANG NAPAKALAKAS NA PUWERSA NG KASAMAAN. WARI AY BUO NA ANG PASIYANG PATAHIMIKIN SIYA NG MGA TAONG NASAGASAAN NG KANYANG LABAN SA KATIWALIAN SA GOBYERNO. HINDI NIYA MATANGGAP NA MAYROONG KARANGALAN NA MAGPASAKOP SA PAGTATAGUMPAY NG KASAMAAN.

ANG ISANG TAO AY KINIKILALANG WALANG SALA HANGGA’T HINDI NAPAPATUNAYAN ANG MGA BINTANG SA KANYA. SUBALIT KAPAG HINDI SIYA PINANHINTULUTANG MAG-PIYANSA , SA TOTOO LAMANG AY NAUNA NA ANG PARUSA SA SENTENSYA. ANG AKUSADO AY MAGDUDUSA SA PIITAN BAGO PA MAN MAHATULAN. ANG KONSTITUSYON NG PILIPINAS AY NAGSASABING HINDI PAPAYAGANG MAGPIYANSA ANG AKUSADO KAPAG MATIBAY ANG EBIDENSYA LABAN SA KANYA. SA KASO NI PING, HINDI LAMANG MAHINA ANG EBIDENSYA. ITO AY GAWA-GAWA LAMANG AT MGA PINAGTAHI-TAHING KASINUNGALINGAN . ISANG “AFFIDAVIT” NA SALUNGAT SA NAUNANG SALAYSAY NG MISMONG NAG-AAKUSA AT SALUNGAT DIN SA PAHAYAG NG MGA TAONG BINABANGGIT AT ITINURO NIYANG MAGKAKASAMA AT NAG-UUSAP. SI MANCAO AY ISANG HINDI MAPAGKAKATIWALAANG TESTIGO KAYA’T KAMI AY LABIS NA NAGTATAKA SA PATULOY NA PAGTANGGI NG DOJ SECRETARY PARA MAGKAROON NG “RE-INVESTIGATION” KAHIT NA NGA NASABI NA NIYA NA SAKOP IYON NG KANYANG “PLENARY POWERS”, AT SA KABILA NG NAGLITAWANG PRUWEBA SA PAHAYAG NINA OXIMOSO AT MICHAEL RAY AQUINO. POSIBLE KAYA NA HINDI WASTO ANG IPINAPAYO SA KANYA NG MGA DOJ PROSECUTORS NA SIYANG NAGSAMPA NG KASO?

1. HINDI BA PRAKTIKAL LAMANG NA BIGYANG TIMBANG ANG MGA SINUMPAANG PAHAYAG NG TATLONG TAO LABAN SA KWENTO LAMANG NG ISANG TESTIGO NA UMAMIN PANG HINDI SIGURADO SA KANYANG NARINIG? AT ILANG BUWAN BAGO TUMESTIGO AY INAALOK NG DATING GOBYERNO, AYON MISMO SA KANYA, PARA IDIIN SI PING KAPALIT NG NAKARARAHUYONG PANGAKO? WALA BANG HALAGA ANG PAHAYAG NI DUMLAO KUNG PAANO SIYA PINAHIRAPAN PARA LAMANG PILITIN NA IDIIN SI PING SA KASO?
2. IPALAGAY NATING TOTOO KAHIT KASINUNGALINGAN ANG KWENTO NI MANCAO NA PINAGUSAPAN ANG PAGPATAY KAY DACER SA LOOB NG SASAKYAN. SINO ANG SINASABING “BIGOTE” NA SIYANG UTAK SA PAGPATAY KAY DACER? BAKIT HINDI SIYA KILALANIN AT USIGIN SA HALIP NA SI PING ANG PILIT NA INAAKUSAHANG “MASTERMIND”? HINDI BA NAMAN MASYADONG HALATA NA ANG PAKAY LAMANG NILA AY IPAKULONG SI PING?
3. AT PAANO MANGYAYARI NA SAMANTALANG SI PING AY NASA ESTADOS UNIDOS AY MAKAKASAMA SIYA SA SASAKYAN NINA MANCAO AT AQUINO SA GREENHILLS ? HINDI BA’T MALIWANAG NA KABULAANAN ANG NILALAMAN NG “AFFIDAVIT” NI MANCAO?
4. ANG NILALAMAN NG “AFFIDAVIT” NI MANCAO AY TUWIRAN NANG KINONTRA SA NAGING PAHAYAG NG KANYANG ABOGADO SA HUSGADO : “HE ONLY LEARNED OF THE SORDID AFFAIR EX POST FACTO”. IBIG SABIHIN, NALAMAN LAMANG NI MANCAO ANG TUNGKOL SA KRIMEN MATAPOS NA ITO AY MANGYARI NA. SAMAKATUWID, SI MANCAO AY WALA TALAGANG ALAM SA SINASABI NIYANG PLANO NG PAGPATAY KATULAD NG PAULIT-ULIT NA SINASABI NIYA KAY DUMLAO NANG SILA AY MAGKASAMA PA SA AMERICA. TUGMA ITO SA MGA PAHAYAG NI DUMLAO SA KANYA NAMANG “AFFIDAVIT” NA WALA TALAGANG ALAM SI MANCAO BAGO MANGYARI ANG KRIMEN.

KUNG ANG MAPAGNAKAWAN NG ISANG MAHALAGANG BAGAY AY MASAKIT, HINDI MASUSUKAT NA KIROT AT PAIT ANG MAPAGNAKAWAN NG KARANGALAN ANG ISANG PAMILYA. SA NGAYON AY HINDI NAKAPIIT ANG AMING KAPATID, SUBALIT DAMA NAMING LAHAT ANG LABIS NIYANG PAGHIHIRAP. ANG PAGHIHIRAP SA ISIP AT DAMDAMIN AY MAS MAHAPDI KAYSA PISIKAL NA SAKIT. ANG MAPALAYO SA SARILING TAHANAN AT MGA MAHAL SA BUHAY AY SADYANG NAPAKAPAIT. IPINAPANALANGIN NAMING MAGKAKAPATID NA MAKAPILING SI PING NGAYONG PASKO KAHIT NA SA ISANG SIMPLENG PAGSASALO-SALO. GAYA NG KAUGALIAN NATING MGA PILIPINO.

ISANG KAIBIGAN ANG NAGPADALA SA AMIN NG MENSAHE: “MULA SA MAKAPAL AT MADILIM NA ULAP, ANG DALISAY NA TUBIG ULAN AY BIYAYANG PAPATAK; SA MALALIM AT MADILIM NA MINAHAN, ANG MAMAHALING BATO AT METAL AY MATATAGPUAN. AT SA PINAKAMABIBIGAT NA PAGSUBOK NG BUHAY, LUBOS ANG BASBAS AT BIYAYA ANG POONG MAYKAPAL.” ITO AY AMING PINANINIWALAAN. ANG KATOTOHANAN AT ANG KATARUNGAN AY MANANAIG. ANG DIYOS AY HINDI NATUTULOG.

PANSAMANTALA’Y MAGPAPASALAMAT KAMI SA LAHAT NG KASAMA NAMIN SA PANANALANGIN SA PAGTATAGUYOD NG KATOTOHANAN AT KATARUNGAN.

KAMING MGA KAPATID NI SENADOR PANFILO “PING” LACSON.



ROMULO LACSON FELICIANO LACSON REYNALDO LACSON JUANITO LACSON



ERNANI LACSON MA. CORAZON LACSON- MAGPAYO MA. CRISTINA LACSON- DIAZ